शौकीन

"अहा देश कसा छान - माझं हरलं भान,
हिरवं हिरवं रान - कवळं नागनेली पान,
कसा पिकला ग गहु हरभरा - वरी शाळु-मक्याचा तुरा,
महाराष्ट्रदेश सुंदरा - सोनेरी गुढी मंदिरा ..."
असं बेभान करणारं सौदर्य
दगडफुलांच्या देशातही आपल्याला वेड लावतंच ....
पण नंतर काय होतं?
मळ्यांच्या बागशाही दर्शनानं सुखावलेलं
पोटरीला आलेल्या कणसांच्या गंधानं धुंदावलेलं
आपलं मन
सह्याद्रीवरून खाली झेपावतं
सागरतीरी, कुळागारांत भटकून येतं
तर कधी जातं
क्षितिजापावत पसरलेल्या वाळवंटात, महाल हवेल्यांत ...
किंवा अप्रूप वाटावं अशा पाणवठ्यांवर
रंगश्रीमंत वस्त्रांच्या, बिलोरी काकणांच्या झगमगाटात
रंगील्या राजस्थानात ...
शिवाय नेपाळ, लदाख या अद्भुतांच्या राज्यांत
आणि कधीही न उलगडणार्‍या हिमालय नावाच्या रहस्यात ...
- वसंत बापट